زەنگی مەترسیدار بەڕووی هەرێم لێدرا عێراق باسی به ئه‌لیكترۆنیكردنی سه‌رجه‌م ده‌روازه‌سنوریەکان دەکات
زەنگی مەترسیدار بەڕووی هەرێم لێدرا عێراق باسی به ئه‌لیكترۆنیكردنی سه‌رجه‌م ده‌روازه‌سنوریەکان دەکات
سه‌رۆكی لیژنه‌ی دارایی په‌رله‌مانی عێراق رایگه‌یاند، له كۆبونه‌وه‌ی ئه‌مڕۆیاندا له‌گه‌ڵ ته‌یف سامی، وه‌زیری دارایی عێراق باسی به ئه‌لیكترۆنیكردنی سه‌رجه‌م ده‌روازه‌كان كراوه بۆ ئه‌وه‌ی "گه‌نده‌ڵی و رۆتین" كه‌مببێته‌وه، ده‌شڵێت، "به‌شێك له كێشه‌كان حكومه‌تی هه‌رێمه و ئه‌گه‌ر بوترێت ئه‌و بابه‌ته له وه‌زاره‌تی دارایی عێراقه نه‌خێر وانییه".
عه‌توان عه‌توانی ئه‌مڕۆ دوای كۆبونه‌وه‌ی لیژنه‌كه‌یان له‌گه‌ڵ ته‌یف سامی، وه‌زیری دارایی عێراق، له لێدوانێكدا بۆ رۆژنامه‌نوسان، رایگه‌یاند، "داوا ده‌كه‌ین گوشار بخرێته سه‌ر حكومه‌تی هه‌رێمی كوردستان بۆ ئه‌وه‌ی په‌له بكات له‌پڕۆسه‌ی به ئه‌لیكترۆنیكردنی موچه‌ی هه‌مو فه‌رمانبه‌رانی هه‌رێمی كوردستان هاوشێوه‌ی هه‌مو فه‌رمانبه‌رانی عێراق".
ئاماژه‌ی به‌وه‌شكرد، بڕیاری دادگای فیدڕاڵی عێراق په‌یوه‌ست به موچه‌ی فه‌رمانبه‌رانی هه‌رێمی كوردستان رونه و وه‌زاره‌تی دارایی عێراق له‌مانگی (ئازار/3) ناتوانێت موچه خه‌رجبكات چونكه له‌به‌رده‌م دادگا به‌رپرس ده‌بێت ئه‌گه‌ر هاتو موچه‌كه جێگیر نه‌كرێت، له كۆبونه‌وه‌ی ئه‌مڕۆ "باسی هۆكاری دواكه‌وتنی پڕۆسه‌كه كرا و ئه‌گه‌ر لۆژیكی بن ده‌كرێت ئه‌وه له‌به‌رچاو بگیردرێت، ئه‌گه‌رنا ناكرێت رێگه به‌وه بدرێت به‌هیچ شێوه‌یه‌ك".
په‌یوه‌ست به نه‌ناردنی موچه‌ی وه‌زاره‌تی پێشمه‌رگه و هێزه ئه‌منییه‌كانی دیكه‌ی هه‌رێمی كوردستان، سه‌رۆكی لیژنه‌ی دارایی په‌رله‌مانی عێراق وتی، "ئه‌مه باس نه‌كرا، به‌شێك له كێشه‌كان حكومه‌تی هه‌رێمی كوردستانه و ئه‌گه‌ر بوترێت ئه‌و بابه‌ته له وه‌زاره‌تی دارایی عێراقه نه‌خێر وانییه، یاسای بودجه یاسایه‌كی فیدڕاڵییه و برایان له هه‌مو فراكسیۆنه‌كان له‌گه‌ڵ ئێمه‌دان له نێویاندا برایان پارتی دیموكراتی كوردستان".
ئه‌وه‌شی خسته‌ڕو، "چه‌ندین جار حكومه‌تی فیدڕاڵی ده‌یه‌وێت ببێته ده‌رچه‌یه‌ك بۆ چاره‌سه‌ركردنی بابه‌تی موچه‌ی فه‌رمانبه‌ران و ئێمه‌ش زۆر تێبینیمان هه‌بوه له قه‌رزی سه‌ر هه‌رێمی كوردستان به‌ڵام ئێمه ئه‌وه‌مان تێپه‌ڕاندوه به‌مه‌به‌ستی مرۆیی و پێویسته هاوڵاتیان ئه‌م گوناهه بگرنه ئه‌ستۆی خۆیان له هه‌رێمی كوردستاندا چونكه هیچ تاوانێكیان نییه".
